پیدایش ۴۲
۴۲
یوسفٚ برأرأن شیدی مصر
۱ وختی کی یعقوب بیشنَوسته مصرٚ دورون گندم پیدا به، خو زأکأنَ بوگفته: «چره اَیه به پا ایسه‌ییدی، کس کسَ فندریدی؟ ۲ بیشنَوستم کی مصرٚ دورون گندم فراوانه، بیشید اویه گندم بیهینید بأورید کی زنده بمأنیم و نیمیریم.» ۳ پس ده‌تأ جٚه یوسفٚ برأرأن رأ دکفتیدی، بوشوییدی مصر کی گندم بیهینید. ۴ ولی یعقوب، بنیامینَ کی یوسفٚ برأرٚ تنی بو اوشأنٚ اَمرأ اوسه نوکوده، چونکی ترسه‌یی اونٚ سرم ایتأ بلا بأیه. ۵ پس ایسرائیلٚ پسرأنم جٚه اوشأنی بید کی گندمٚ وسی بَمو بید، چونکی سرزیمینٚ کنعانٚ دورونم قحطی بَمو بو.
۶ او وخت یوسف، سرزیمینٚ مصرٚ حاکم بو؛ اون بو کی مردومَ گندم فروختی. پس وختی کی اونٚ برأرأنم فأرسه‌ییدی، یوسفٚ جُلُو احترامٚ اَمرأ زانو بزه‌ییدی و خوشأنٚ سرَ بیجیر بأوردیدی. ۷ هَطو کی یوسف خو برأرأنَ بیده، اوشأنَ بشنأخته. ولی وانمود بوکوده کی اوشأنَ نشنأسه و خشونتٚ اَمرأ گب بزه و اوشأنَ وَورسه: «جٚه کویه بَموییدی؟»
جواب بدَییدی: «سرزیمینٚ کنعانٚ جَا بَموییم کی گندم و خوراک بیهینیم.»
۸ یوسف خو برأرأنَ بشنأخته، ولی اوشأن، یوسفَ نشنأختیدی. ۹ بَزین یوسف خوابأنی‌یَ کی درباره‌یٚ اوشأن بیده‌بو، به خاطر بأورده و بوگفته: «شومأن جاسوسیدی! بَموییدی بیدینید کویه اَمی سرزیمین بی‌دفاع ایسه.»
۱۰ اوشأن جواب بدَییدی: «نه سرور، اَمأن شیمی نوکرأن بَموییم خوراک بیهینیم. ۱۱ اَمأن همه‌تأن اینفرٚ پسریم. اَمأن، شیمی نوکرأن، جاسوس نی‌ییم، بلکی آدمأنٚ شریفی ایسیم.»
۱۲ یوسف اوشأنَ بوگفته: «نه، شومأن بَموییدی بیدینید کی سرزیمینٚ مصر جٚه کو طرف بی‌دفاع ایسه.»
۱۳ اوشأن جواب بدَییدی: «اَمأن، شیمی نوکرأن، دوازده‌تأ برأریم، ایتأ پئرٚ پسریم کی سرزیمینٚ کنعانٚ دورون زندگی کونه. اَمی کوجه برأرم هسه اونٚ ورجه ایسه. ایتأ جٚه اَمی برأرأنم گومَ بوسته.»
۱۴ یوسف اوشأنَ بوگفته: «هَنه کی شمرَ بوگفتم: شومأن جاسوسیدی! ۱۵ پس شمرَ اَطویی ایمتحان کونم: به جانٚ فرعون قسم کی تا شیمی کوجه برأر اَیه نأیه، ونألم مصرٚ جَا بیشید. ۱۶ ایتأ جٚه شومأن بشه شیمی کوجه برأرَ بأوره اَیه، بقیه‌یٚ زندانٚ دورون ایسیدی کی بفهمم حقیقتَ گفتن دریدی یا نه. ولی اگه دوروغ بوگفته‌بید به جانٚ فرعون قسم کی جاسوسیدی.»
۱۷ پس یوسف همه‌تأنَ سه روز زندانی بوکوده. ۱۸ سوّمی روزٚ دورون اوشأنَ بوگفته: «هرچی شمرَ گم، انجام بدید کی زنده بمأنید. چونکی من خودا جَا ترسم: ۱۹ اگه شومأن آدمأنٚ درستکاری ایسیدی، ایتأ برأر زندانٚ دورون بِیسه. اوشأنٚ دیگرم گندمأنَ بار بزنید ببرید شیمی فامیلأنٚ ره کی بی‌خوراک نمأنید. ۲۰ ولی شیمی کوجه برأرَ وأ بأورید می ورجه کی بفهمم شیمی گبأن درسته و نیمیرید.» اوشأنم قوبیل بوکودیدی.
۲۱ همدیگرَ بوگفتیدی: «یقین دأریم اَمی کوجه برأرٚ اَمرأ بدی بوکودیم، چره کی وختی اون خو جانٚ وسی اَمرَ ایلتماس کودی، اَمأن اونٚ پریشانی‌یَ بیده‌ییم، ولی اونَ محل نوکودیم. هَنٚ وسی ایسه کی اَ جور گرفتارَ بوستیم.»
۲۲ رئوبین جواب بدَه: «من شمرَ بوگفتم کی در حقٚ اون گوناه نوکونید ولی شومأن گوش ندَییدی! هسه اونٚ خون دکفته اَمی گردن، وأ اونٚ جوابَ پس بدیم.»
۲۳ اوشأن نأنستیدی کی یوسف اوشأنٚ گبأنَ فهمه، چونکی ایتأ مترجم مابینٚ اوشأن ایسَه‌بو. ۲۴ یوسف جٚه اوشأنٚ ورجه بوشو و گریه بوکوده. وختی کی وأگردسته اوشأنٚ اَمرأ گب بزه. بَزین فرمان بدَه شمعونَ بیگیرید و اونٚ برأرأنٚ چومأنٚ جُلُو دَوَدید.
۲۵ بَزین یوسف دستور بده کی اوشأنٚ خورجینَ گندمٚ اَمرأ پورَ کونید و هر کسٚ نقره‌یَ وأگردأنید خودشٚ کیسه دورون بنید و خوراکٚ سفرم اوشأنَ فدید. پس اَ کارأنم انجام بیگیفته. ۲۶ اوشأنم گندمأنَ خوشأنٚ اولاغأنٚ سر بار بوکودیدی و رأ دکفتیدی.
۲۷ غروب دم فأرسه‌ییدی نخلستانٚ میأن کی شب اویه بِیسید. ایتأ جٚه اوشأن بوشو اولاغٚ خوراک بده. وختی خو کیسه‌یَ وأکوده، خو پولٚ نقره‌یَ او دورون بیده. ۲۸ خو برأرأنَ بوگفته: «می پولٚ نقره‌یَ وأگردأنه‌ییدی، بیدینید، می کیسه دورون نهَه.» اوشأنٚ دیل ایسَن دوبو، پرکستیدی و کس‌کسَ فندرستیدی و بوگفتیدی: «اَن دِ چی بلایی ایسه کی خودا اَمی سر بأورده؟»
۲۹ وختی کی وأگردستیدی کنعان خوشأنٚ پئرٚ ورجه، هرچی کی پیش بَمو بو اونٚ‌ره نقل بوکودیدی. ۳۰ بوگفتیدی «او مردأی کی او سرزیمینٚ حاکمه، اَمی اَمرأ توندی مره گب بزه، جاسوسأنٚ مأنستن اَمی اَمرأ رفتار بوکوده. ۳۱ ولی اونَ بوگفتیم: ‹اَمأن آدمأنٚ درستکاری ایسیم؛ جاسوسی‌یم نوکونیمی. ۳۲ اَمأن دوازده‌تأ برأریم، ایتأ پئرٚ پسریم. اینفرم گومَ بوسته، اَمی کوجه برأرم کنعانٚ دورون اَمی پئرٚ ورجه ایسه.› ۳۳ او مردأی کی او سرزیمینٚ حاکمه، اَمرَ بوگفته: ‹اَطویی فهمم کی آدمأنٚ درستکاری ایسیدی کی ایتأ برأر اَیه بِیسه، بقیه بیشید گندمأنَ اوسَنید ببرید کی شیمی خانواده‌یأن گوشنه نمأنید. ۳۴ ولی شیمی کوجه برأرَ بأورید می ورجه کی بدأنم آدمأنٚ درستکاری ایسیدی نه جاسوس. منم شیمی برأرَ آزادَ کونم کی بتأنید اَ سرزیمینٚ دورون تجارت بوکونید.›»
۳۵ وختی کی اوشأن خوشأنٚ خورجینٚ گندمَ وأکودیدی، هر کس خو پولٚ خو خورجینٚ دورون بیأفته. وختی کی اوشأن خوشأنٚ پئرٚ اَمرأ خوشأنٚ پولٚ کیسه‌یأنَ بیده‌ییدی، بترسه‌ییدی. ۳۶ یعقوب بوگفته: «شومأن می زأکأنَ می جَا فیگیفتیدی؛ یوسف کی دِ نِیسه، شمعونم کی نِیسه. هسه بنیامینم می جَا فیگیفتَن دریدی. همه‌یٚ اَ بلایأن می سر بَمو.»
۳۷ رئوبین خو پئرَ بوگفته: «اگه اونَ دوواره تی ورجه نأوردم، تو تأنی می دوتأ پسرَ بوکوشی. اونَ مرَ بیسپر، منم اونَ وأگردأنم اَورم.»
۳۸ ولی یعقوب بوگفته: «شیمی اَمرأ اویه اوسه نوکونم، چونکی اونٚ برأر بمرده. هَه ایتأیه کی مِره بمأنسته. اگه اَ سفرٚ دورون ایتأ بلا اونٚ سر بأیه، می اَ سیفیدٚ مویأنَ غم و غورصه اَمرأ به گیلَ کونیدی.»
Currently Selected:
پیدایش ۴۲: گیلکی (رشتی)
Označeno
Share
Copy
Want to have your highlights saved across all your devices? Sign up or sign in
© 2010-2019 Gilak Media